يا قديم السالفه

ياقديم السالفة .. خبرك قديم
السموحه .. زل مبطي وقتها


طيبتي معك اوصلتني للجحيم
تكفي أعذارٍ مضت صدّقتها


ماخلقني خالقي .. شيّال ضيم
فيكـ ادوّر فرحـةٍ .. فارقتها


ياكثر ماشفت بالسلوى نعيم
عقب لوعــاتٍ بحبكـ ذقتها


صرت لي "رغم الغلا" مثل الغريم
كل ما .. فرجت علي ضّيقتها


كم وكم عاهدتني عهدٍ عظيم
وقلت .. ما ابوق العهود .. وبقتها


انتظرتك عقب ميلك تستقيم
وماتت الآمـــال ما حقّقتها


مالهاجــدوى مــداراة الغشيم
جثةٍ .. لو مت .. ما فوّقتها


زدت ظلم وضاق بك صدرالحليم
وثورة البركان .. هذا وقتها

من روائع الشاعر: عبد الرزاق الهذيل