الرئيسية
يازين ريحة العيارين ( تسني بها ريحة حب شمسي وبيالة شاهي )
سالخير كلن بعيارته
أدري أني ابطيت عليكم ومن زمان الـسسحيق مافرشتلي موضوعن فيـذا
وأدري أن محدن جاب خبري بس قلت وش ذا أهلي الي ربوني لهم حق ولازم أبطح لهم موضوع بين الفينه والفينه
عشان كذا قررت أحط مويضيع مهـوب دسم كوده مايشنقل للماصله اللي كلن يخاف منه
في يوم من الأيـام الي عشت بها على هالدنيا كنت منجطلتن بغرفتي واللاب توب قدامي إلااا افنان تسولفلي عن مرررت خااالهااا مااادريت الا الي يرزح علي الباب
قلت : مييييييييييييييييييييييييييييييييييييين
؟مير يرد علي العصل أخوي أفتحي يادبـششه فتحت له وكالعاده يقااااهي بلا سبب ولا منااسسبه
قلت ألحييين وش تضحك عليه يالهيـسس
؟ قال حولي لأمي لا تهبدتـسس
نزلت لأمي أثر أبوي جايبنلها لحم وقاعدتن تكيسه وأبوي بالصاله يتبوسم
إلا وأنزغها بالسكين مع كتفها قلت ناديتيني
مااادريت الا وهي تنزرني : سسسكيييين ذي 
تحطييينها على كتـفي يــابقره أفررضي لوانها شششاقتن كتفي وش بتزينين
؟ واااااااااوك هالشقرااااويه ماتنتحـارشش أعـوذ بالله ...
قلت طيب مناديتني ؟
قالت دوتس الأكياس وفرزلي اللحم ما أبيهن جلافيط أبيهن حول بعض ...
إخذت الأكياس وانا حايمتن تسبدي من شيّن أشوفه دمامين ومزاليط ( فيس يطرش )
قعدت أفرزل وأشوف العصل يزهب عزبة البر قلت على وين العزم يبو ؟ < يحلفون أنها شنب
ومير يسفهني قلت هييييييين أوريك يالهيس وأقوم ألحقه ويدي تقوطر دمامين وأرجف سيقانه وأنحاااش لأبوي الي مستمر بالتبوسم قلت لا تقربني لا أحوس ثيابك بهالدم
مير راح ينقل عفاشه من السيب للباب الداخلي وانا بطريقي للحم أسمع أمـي تقول له لاتبطي يبوي ولا تبعدون
هي قالت هالكلمه ولا مااااقالتها مييير اني طنقرت وبدت الدنيا تقفل بوجهي وحسيت الدنيا مجرمه وقليلة أدب ووصخه ومالها خوي
وبدى يضيق صدري وانا أفرزل اللحم وأقول ليه ليه الولد ماخذن حقه ثالث مثلّث والبنت ضعيفه مغير تحوس بهالدويره ومكروفه كرف الحمير ياحيل الله
؟ليه الولد يستانس ويروح مع أخوياه وانتي ياعيوني يالبنيه منثبرتن عند أهلتس أن طلعو طلعتي وأن ماطلعو كلتي تبن ولا تروحين لصديقاتس ألا بعد نقصة الروح وأسئلتن مامنها خير ( منهي بنته ؟ أمها منين ؟ وينهم ساكنين ؟ عندها أخوان كبار ؟ منهم من أهله
) إن جازت لأهلتس رحتيلمها وأن ماجازت لهم أنطقيتي ياعمريلتس
وراه كل ماطق عودن بعود قالولتس تعالي زيني وصلحي وحطي وحمري والولد فارشن كرشته قبال ذا الشاشات أن قلتي له عطني كرتونة المنديل حولك جدعها عليتس برجوله ؟
وبدت عيوني تغورق دموع
فجـأة تخيلت لو أني جذيييييع وش أبزين
؟أول شي بأخلي أسسـمي بدر بن عبدالمحـسسن وأن صار أسمي بدر بن عبدالمحسن طبيعي بأطلق مرتي بقصيده
ومعي ددسن آخر موديل أغير الجنط وألمع الدفرنس وأذهب الصدام > يحلفون مرتن ثانيه أنها شنب وطبيعي أن صار معي ددسن يصير معي كيس حب باجه نصه قشم وكرتون حمضيات بالصندوق صاقعته الشمس وطايرتن غازاته ..
وعندي خويه أسمها إعتماد
لاتقولون من وين جايبتن هالأسماء شي نفسي بداخلي لو سمحتو لاتكثرون ..أواعدها كل شهرين ببلشرف بزعم انه أقرب محل لم بيتهم وأنا بأول السيب وهي بآخره وأشتريلها صابونة دوف ورديه هديه مكتوبن عليها (القلب عقبتس بغسله بصابونه[size=9] ) وألفزها بكيستها ..
وأروح للتحليه تالي الليل أنا وماهر وعبدالإله وعبدالمعين >> أخوياي وأنا جذيع
ونخمس بطريق الملك عبدالعزيز إمتداد طريق الملك سعود إمتداد طريق الملك فيصل إمتداد طريق الملك فهد إمتداد طريق الملك عبدالله إمتداد طريق الأمير سلمان ( حتى لو ماعندهم أطرقه أبمشي بالكبر )
ثم بروح لجده أتمرقص بدرة العروس وأتشعبط بحدا هالبني ثم أطير من جده للبحرين أنا وأخوياي الي ذكرتهم سابقاً
وإذا رجعت الرياض بأروح للبر شهر كامل وأتبطح على التربات ونقشم حب ونذبحلنا ذبيحه ونشويها ونستانس
ثمن أروح لأحد المقاهي المفتوحه من الظهر لين تالي الليل وأقحن من هالقهاوي وهالشواهي ألين أحفر آبآر بجوفي من كثر الشرب ..
ثمن أزاعل إعتماد هالسنبوكه لانها خانتني وخاوت ماهر عشان عيونه زرق وأبوه كاااااش
واكتب بها قصصيده وأدور بالبيت بصروال سنه وفنيلة علاّق وطاقيه وأحلق صفر وأطلع اتعششى بماك الساعه 2 الفجر وبعد لو اني ولد جلدتني وانا بنت بدون سبب ثمن سامحتني وصرت صديقتي وضحكت معي ثمن جلدتني ثانيه
وبآخذ أهلي أعمربهم وش بـسسوي بعـد ؟ وانا أهوجس مادريت الا وأنا أسمع طررررررررررررررررررررطع
أثره أبوي متكرفسس من كثر ماتبوسم اليوم وآخذه و أوديه لغرفته وأفكر لوهله ..
( لو أني ولد كان ماصرت بالبيت ألحين وقومت أبوي أجل أششوآ أني بنت
) والحمدلله انه طاح عشان أصحى من ذا الغيبوبه الي جتني
عقبهـآ رحت أناظر نفسي بالمرايه وأقول حراام كل هالأنوثه تروح عشان قطعة إعتماد وسيارة ددسن وحب بآجه
المفروض الواحد يآكل تبن ويرضى باللي عنده مهوب ينآظر العآلم ..
الحمدلله هذانا حنا نروح للعروس وطقطقه وهم مايحظرون
هذانا نقدر نناظرهم ومايقدرون يناظرون كنها تظليلة سيارة خالي محمد الي داخل يشوفون واللي برآ لا خخخخخ
وهذانا نتزوج بلا وظيفه ولاديون ولاشي أما هم ضعيفين الواحد مايتزوج الا وهو حايمتن كبده من طاري العرس
ديون وسلايف وبالطقاق لين لقى له وظيفه و بالطقاق يدور ششقه آجار زينه ورخيصه
مير الحمدلله على النـعمه
مــآيسستفـآآد
::- ترى أمي مهب أم عبدالرزاق
- النظافه من الإيمـان
- الرضاء باللي كاتبه الله لك مكتوب انك بتفرزل لحم بذا اليوم بتفرزله حتى وان عيّو العالم كلهم
وان كتب الله لك انك تخاوي إعتماد فأنت بتخاويها حتى وأن عيّو العالم كلهم
كلش مكتوب ومقّدر
- ترى لحد يصدق سالفة طيحة أبوي من الدرج فهي لاتحمل من الصدق ولا 0%
< جتها نعلهوان كان الله كتبلي أزور السماجه لاتنسوننا الله يرضا عليكم بأبو كفتين
؛
[/size]
